Kattaqo‘rg‘on shahri hududi kengaytiriladi
Shahar o‘z maqomini o‘zgartirib, o‘rta shaharlardan katta shaharlar toifasiga o‘tkazilishi rejalashtirilgan.
Oliy Majlis Qonunchilik palatasining navbatdagi majlisida Samarkand viloyatidagi Kattaqo‘rg‘on shahri va unga tutash tumanlar — Kattaqo‘rg‘on va Nurobod tumanlari hududiy chegaralarini o‘zgartirish to‘g‘risidagi qaror qabul qilindi. Ushbu qaror asosida shahar maydoni kengayib, iqtisodiy va ijtimoiy salohiyati yanada oshirilishi rejalashtirilmoqda.
Qarorga muvofiq, Kattaqo‘rg‘on shahri tarkibiga Kattaqo‘rg‘on tumanidan 1 945 gektar, Nurobod tumanidan esa 971 gektar yer qo‘shiladi. Bundan tashqari, Nurobod tumanining yana 600 gektar maydoni Kattaqo‘rg‘on tumani tasarrufiga o‘tkaziladi. Bu o‘zgarishlar shahar infratuzilmasini rivojlantirish va aholiga yanada qulay yashash sharoitlarini yaratish maqsadida amalga oshirilmoqda.
Hududiy kengayish bilan bir qatorda, iqtisodiy faollikni oshirishga ham e’tibor qaratiladi. Xususan, 50 gektar yerda “Urgut” erkin iqtisodiy zonasining filialini va 30 gektar yerda uchta kichik sanoat zonasi tashkil etilishi ko‘zda tutilgan. Bu esa yangi ish o‘rinlari yaratish va xizmatlar ko‘lamini kengaytirishga xizmat qiladi.
Shuningdek, Kattaqo‘rg‘on shahri o‘z maqomini o‘zgartirib, o‘rta shaharlardan katta shaharlar toifasiga o‘tkazilishi rejalashtirilgan. Bu esa kelgusida shaharning investitsion jozibadorligini oshirishi, tashqi investorlar uchun yangi imkoniyatlar yaratishi mumkin.
