O‘zbekistonda Suv kodeksi qabul qilindi

30-iyul kuni qabul qilingan O‘zbekiston Respublikasining “Suv kodeksi to‘g‘risida”gi Qonun (O‘RQ–1076-son) bilan mamlakatda suv resurslarini boshqarish va undan foydalanishga oid asosiy huquqiy hujjat – Suv kodeksi tasdiqlandi.

 

Yangi Kodeks suv resurslari, suv xo‘jaligi obyektlari va suv fondi yerlaridan oqilona foydalanish, ularni muhofaza qilish sohasidagi munosabatlarni huquqiy jihatdan tartibga solishga xizmat qiladi.

 

Suv kodeksida quyidagi asosiy qoidalar belgilab qo‘yilgan:

 

Suv – umumxalq boyligidir va undan oqilona foydalanish davlat himoyasida bo‘ladi;

 

Suvdan foydalanish ikki shaklga – umumiy va maxsus foydalanishga bo‘linadi;

 

Suv obuektlari toifalariga O‘zbekiston hududidagi yer usti va yer osti suv manbalari, shuningdek, mamlakatdan o‘tuvchi transchegaraviy suv obyektlari kiradi;

 

Suv obyektlari yakka tartibda yoki boshqa foydalanuvchilar bilan birgalikda foydalanilishi mumkin.

 

Kodeksda shuningdek, suv resurslarini boshqarish sohasida qarorlar qabul qilishda hamkorlikni kuchaytirish maqsadida respublika, havza va zarur hollarda hududiy darajadagi Suv kengashlari tashkil etilishi belgilangan. Bundan tashqari, Vazirlar Mahkamasi huzurida Respublika Suv kengashi tashkil etiladi.

 

Mazkur Qonun rasmiy e’lon qilingan kundan boshlab 3 oydan keyin kuchga kiradi.