Toshkentda YPX xodimini haqoratlagan haydovchi qamaldi
U poytaxt ko‘chalarida yuqori tezlikda harakatlanib, inspektorning talabiga bo‘ysunmagan.
Ijtimoiy tarmoqlarda shahar bo‘ylab soatiga 200 km dan ortiq tezlikda harakatlanayotgan Zeekr 007 rusumli avtomashina haydovchisi inspektorning talabiga binoan to‘xtamay, uni haqorat qilgani aks etgan video tarqaldi.
Toshkent shahar Ichki ishlar bosh boshqarmasi tomonidan voqea holatlari o‘rganilib, huquqbuzarning shaxsi aniqlandi. Maʼlum bo‘lishicha, haydovchi bir vaqtning o‘zida bir nechta yo‘l harakati qoidalarini buzgan.
Ichki ishlar bo‘limida 19 yoshli haydovchi yigit o‘z aybiga iqror bo‘lib, inspektor to‘xtatishni talab qilganida, tezlik yuqori bo‘lgani sabab to‘xtab qololmaganini aytdi. Uning mashinada bo‘lgan do‘sti bo‘layotgan voqealarni nafaqat videoga, balki ijtimoiy tarmoqlarga ham joylashtirgan.
Haydovchiga nisbatan Maʼmuriy javobgarlik to‘g‘risidagi kodeksning 183-moddasi (mayda bezorilik) va 194-moddasi (ichki ishlar organlari xodimining qonuniy talablarini bajarmaslik) bilan maʼmuriy ish qo‘zg‘atildi. Sud uni aybdor deb topib, 5 sutkaga maʼmuriy qamoqqa olish bo‘yicha qaror chiqardi.
