Andijonda bola o‘g‘risi ushlangani aytilmoqda
Viloyat IIB u ruhiy nosog‘lom shaxs ekanini bildirdi.
Ijtimoiy tarmoqlarda Andijon viloyatining Shahrixon tumanida bola o‘g‘risi ushlangani aytilgan video tarqalgandi. Holat yuzasidan viloyat IIB rasmiy munosabat bildirdi.
Qayd etilishicha, ushbu videoxabarda aks etgan holat yuzasidan Andijon viloyati IIB tomonidan o‘rganish ishlar olib borilgan.
Maʼlum bo‘lishicha, joriy yilning 31 iyul kuni soat 15:40 larda “102” qisqa raqamiga Shahrixon tumani, Cho‘ja mahallasida yashovchi fuqaro O‘rinboyev G‘anisher tomonidan yashash xonadoniga nomaʼlum shaxs kirib olganligi to‘g‘risida xabar kelib tushgan.
Mazkur xabar yuzasidan hudud profilaktika inspektori zudlik bilan voqea joyiga borib, holatga oydinlik kiritganda, ushbu fuqaro Shahrixon tumani Bo‘ston MFY Yangi qadam ko‘chasida yashovchi, 2019 yildan buyon ruxiy kasalliklar (D) ro‘yxatida turuvchi fuqaro ekanligi aniqlangan.
Ushbu fuqaro hudud profilaktika inspektori tomonidan shu kunning o‘zida Andijon viloyati psixonevrologiya dispanseriga davolanish uchun joylashtirilgan.
“Ijtimoiy tarmoqlar orqali bola o‘g‘risi ushlangani to‘g‘risida tarqatilayotgan xabarlar mutlaqo asosga ega emas”, deyiladi rasmiy izohda.
