Senat voyaga yetmaganlarga nisbatan jinoiy javobgarlikni yumshatuvchi qonunni ma’qulladi
Endi 18 yoshga to‘lgunga qadar sodir etgan yengil jinoyati uchun jazoni o‘tagan shaxs sudlangan hisoblanmaydi.
So‘nggi yillarda mamlakatimizda voyaga yetmaganlarning huquq va erkinliklarini ta’minlash, ularni ijtimoiy hayotga qayta moslashtirishga doir islohotlar bosqichma-bosqich amalga oshirilmoqda.
Oliy Majlis Senatining 9-yalpi majlisida senatorlar tomonidan “Voyaga yetmaganlarga nisbatan jinoiy javobgarlik yanada liberallashtirilishi munosabati bilan O‘zbekiston Respublikasining Jinoyat kodeksiga o‘zgartish va qo‘shimchalar kiritish to‘g‘risida”gi qonun ko‘rib chiqilib, ma’qullandi.
Statistikaga ko‘ra, 2023-yilda 1911 nafar, 2024-yilda esa 2214 nafar voyaga yetmagan jinoyat sodir etgani uchun javobgarlikka tortilgan. Jinoyatlarning katta qismi — ijtimoiy xavfi uncha katta bo‘lmagan va o‘rtacha og‘irlikdagi jinoyatlardan iborat.
Qonun bilan:
18 yoshga to‘lguncha sodir etgan, o‘ta og‘ir bo‘lmagan jinoyati uchun jazoni o‘tagan shaxs sudlangan hisoblanmaydi;
Ozodlikni cheklash va qamoq jazosining eng kam muddati 6 oydan 1 oygacha qisqartiriladi.
Mazkur qonun 2022–2026-yillarda Yangi O‘zbekistonni rivojlantirish strategiyasi doirasida, “Xalq uchun g‘amxo‘rlik va sifatli ta’lim yili” davlat dasturida belgilangan vazifalarni amalga oshirishga xizmat qiladi.
Senatorlarning fikricha, qonun voyaga yetmaganlarga nisbatan jinoiy javobgarlikni insonparvarlik mezonlari asosida yengillashtirib, ularning jamiyatga moslashuviga ko‘maklashadi.
