AQShda ayrim xorijliklar uchun vizalar depozit asosida berilishi mumkin
Viza muddati tugaganidan so‘ng mamlakatda qolib ketish holatlarini kamaytirish uchun yangi tajriba dasturi ishga tushdi.
AQSh Davlat departamenti xorijiy fuqarolar uchun vizalarni berish jarayonida depozit garovi asosida yangi pilot dastur boshlanganini ma’lum qildi. Bu haqda rasmiy bayonotga tayanib, xorijiy OAVlar xabar bermoqda.
Dastur faqatgina B-1 (ishbilarmonlik) va B-2 (sayyohlik) vizalari toifasiga taalluqli bo‘lib, u vizasi muddati tugaganidan keyin AQShda qolib ketish holatlari ko‘p uchraydigan davlatlar fuqarolariga nisbatan tatbiq etiladi.
Ushbu mexanizmga ko‘ra, viza arizachilari AQShga kirishdan oldin 15 ming dollargacha naqd garov pulini to‘laydi. Shaxs AQShdan belgilangan muddatda chiqib ketgan taqdirda, garov mablag‘i to‘liq qaytariladi.
Mazkur tajriba dasturining asosiy maqsadi — immigratsiya tartib-qoidalarining buzilishi oldini olish va vizaning suiiste’mol qilinishiga qarshi kurashishdan iborat.
