Netanyaxu Trampni AQSH saylovlaridan keyin Eronga zarba berishga undamoqda — Axios

 

AQSH prezidenti Donald Tramp Isroil bosh vaziri Benyamin Netanyaxu bilan telefon orqali suhbatlashdi. Axios nashrining xabar berishicha, tomonlar AQSH va Eron o‘rtasidagi muzokaralar holati hamda harbiy harakatlar qayta boshlanishi mumkin bo‘lgan vaqtni muhokama qilgan.

 

Nashr manbalariga ko‘ra, Netanyaxu Trampni 3-noyabr kuni AQSHda bo‘lib o‘tadigan oraliq saylovlardan keyin Eronga qarshi bombardimonlarni davom ettirishga undamoqda.

 

Axios manbalari Tramp hozircha muzokaralarga imkoniyat berishga moyil ekanini bildirgan. Bu yondashuv esa Isroil bosh vazirini xavotirga solmoqda.

 

Nashrning qayd etishicha, AQSH prezidenti bir vaqtning o‘zida ikki yo‘nalishda harakat qilmoqda: Eron bilan muzokaralarni qayta boshlashga urinmoqda va shu bilan birga harbiy amaliyotlarni tiklashga tayyorgarlik ko‘rmoqda. Axios bu yondashuv Tramp “Epik g‘azab” operatsiyasidan oldin ham qo‘llagan strategiyasiga o‘xshashini yozgan.

 

Avvalroq The New York Times gazetasi AQSH harbiylari Eronga qarshi harbiy harakatlarni qayta boshlash rejalarini ishlab chiqayotgani haqida xabar bergan edi. Gazeta ma’lumotlariga ko‘ra, harbiy amaldorlar qisqa, ammo shiddatli operatsiya o‘tkazishdan manfaatdor. Uning ehtimoliy nishonlari qatoriga Eronning raketa va dron arsenali ham kirishi mumkin.

 

Shuningdek, nashr Milliy xavfsizlik kengashi va Pentagon vakillari yaqinda Trampga Eronga qarshi operatsiyalar bo‘yicha bir nechta rejani taqdim etgani, biroq prezident ularning barchasini rad etganini yozgan.