Qozog‘istonga 5 yildan eski avtomobillarni olib kirish taqiqlanadi: yangi talablar qachondan kuchga kiradi?
Mamlakatga avtomobil olib kirishda uning ishlab chiqarilgan sanasi va ekologik toifasi hisobga olinadi.
Qozog‘iston shaxsiy foydalanish uchun mamlakatga olib kiriladigan avtomobillarga yangi talablarni joriy etmoqda. Unga ko‘ra, transport vositalari ishlab chiqarilgan kundan boshlab besh yildan oshmagan va kamida Yevro-5 ekologik standartiga javob berishi kerak.
Bu haqdagi o‘zgartirishlar Qozog‘iston Sanoat va qurilish vazirligi tomonidan tasdiqlangan. Tegishli buyruq mamlakatning normativ-huquqiy hujjatlari ma’lumotlar bazasida e’lon qilingan.
Yangi talablarga muvofiq, jismoniy shaxslar shaxsiy foydalanish uchun olib kiradigan avtomobillarni Qozog‘istonda muomalaga chiqarishga faqat ikkita shart bajarilganda ruxsat beriladi: transport vositasi kamida 5-ekologik toifaga mos bo‘lishi va ishlab chiqarilganiga besh yildan oshmagan bo‘lishi lozim.
Talablar shaxsiy foydalanish uchun mo‘ljallangan ayrim turdagi avtomobillar, mototsikllar va ular uchun tirkamalarga nisbatan qo‘llaniladi.
Buyruq birinchi rasmiy e’lon qilingan kundan 60 kalendar kun o‘tib, 2026-yil 30-dekabrdan kuchga kiradi.
