Jomboydagi “zapravka”da 3 ta mashina yonib ketdi

Samarqand viloyati, Jomboy tumanida 10-avgust kuni kechqurun avtomobillarga siqilgan gaz quyish shoxobchasida yong‘in yuz berdi. Hodisa aks etgan videolar ijtimoiy tarmoqlarda tarqaldi. FVV ma’lumotiga ko‘ra, “Shayman” MFY hududida joylashgan shoxobchada yong‘in haqida xabar soat 22:00 da kelib tushgan.

 

Voqea joyiga 5 ta yong‘in-qutqaruv ekipaji yetib borgan. Yong‘in soat 22:21 da qurshab olinib, 22:30 da butunlay o‘chirilgan. Hodisa oqibatida Kia Bongo, Damas va Gentra rusumli avtomobillar zararlangan. Jabrlanganlar haqida ma’lumot kelib tushmagan.

 

Ayni paytda yong‘in sababi va moddiy zarar miqdori aniqlanmoqda. Mutasaddi organlar voqea yuzasidan tekshiruv olib bormoqda. FVV yong‘in xavfsizligi qoidalariga qat’iy amal qilish zarurligini yana bir bor eslatdi.

 

So‘nggi kunlarda mamlakatning boshqa hududlarida ham shunga o‘xshash holatlar qayd etildi. 8-avgust kuni Xorazm viloyati Urganch shahrida, 5-avgustda Qashqadaryo viloyati Ko‘kdala tumanida zapravka hududida yong‘in va portlashlar sodir bo‘ldi. 16-iyul kuni esa Ko‘kdaladagi gaz to‘ldirish stansiyasida chaqnash oqibatida 5 kishi halok bo‘lgandi.