Shavkat Mirziyoyev Pokiston rahbariga ta’ziya yo‘lladi
Pokistonda kuchli yomg‘ir va yer ko‘chkilari oqibatida 300 dan ortiq kishi halok bo‘ldi.
O‘zbekiston Prezidenti Shavkat Mirziyoyev Pokistonda yuz bergan kuchli yomg‘irlar va yer ko‘chkilari oqibatida halok bo‘lganlar hamda jabrlanganlar uchun chuqur ta’ziya izhor qildi. Prezident Pokiston Prezidenti Asif Ali Zardariy va Bosh vazir Shahboz Sharifga marhumlarning yaqinlariga hamdardlik bildirgan, jabrlanganlar tezda sog‘ayishini tiladi.
Ofat natijasida eng katta talafotlar Xayber Paxtunxva hududida qayd etildi: 74 ta uy vayron bo‘ldi, qutqaruv ishlari davom etmoqda. Shu jumladan, qutqaruv chog‘ida harbiy vertolyot halokatga uchrab, bortdagi 5 nafar ekipaj a’zosi hayotdan ko‘z yumdi. Pokiston meteorologiya xizmati hududda yomg‘irlar 21-avgustgacha davom etishini ma’lum qilgan.
