Iordaniya podshohi “Boqiy shahar” majmuasi bilan tanishdi
Samarqandda oliy martabali mehmonlarga milliy hunarmandchilik va san’at namunalari ko‘rsatildi.
Iordaniya Hoshimiylar Podshohligi Podshohi Abdulla II ibn al-Husayn O‘zbekiston Respublikasi Prezidenti Shavkat Mirziyoyev hamrohligida Samarqand xalqaro turizm markazidagi “Boqiy shahar” tarixiy-etnografik majmuasiga tashrif buyurdi.
Tashrif davomida oliy martabali mehmon xalqimizning boy madaniy merosi, milliy hunarmandchilik va amaliy san’at namunalarini o‘zida mujassam etgan ko‘rgazmalarni tomosha qildi. Shuningdek, milliy raqs va musiqa jamoalarining chiqishlari namoyish etildi.
Mazkur majmua hududida xalqimiz tarixining ramzlari, mamlakatimiz shaharlaridagi diqqatga sazovor joylarning me’moriy nusxalari barpo etilgan. Unda nafaqat milliy an’analar, balki O‘zbekistonning turli xalqlar va do‘st mamlakatlar bilan uzoq yillik hamkorlik tarixi ham o‘z aksini topgan.
Mazmunan boy ekspozitsiyalar va tarixiy hamda bugungi kun uyg‘unligi mehmonlarda katta taassurot qoldirdi.
Eslatib o‘tamiz, O‘zbekiston – Iordaniya sammitining asosiy tadbirlari, jumladan, oliy darajadagi muzokaralar 26-avgust kuni bo‘lib o‘tadi.
