Shavkat Mirziyoyev Yaponiya tashqi ishlar vaziri boshchiligidagi delegatsiyani qabul qildi
Uchrashuvda strategik sheriklik masalalari, yirik investitsiya loyihalari va ta’lim sohasidagi hamkorlik muhokama qilindi.
O‘zbekiston Respublikasi Prezidenti Shavkat Mirziyoyev 27-avgust kuni mamlakatimizga rasmiy tashrif bilan kelgan Yaponiya tashqi ishlar vaziri Takesi Ivaya boshchiligidagi delegatsiyani qabul qildi.
Uchrashuv avvalida yuqori martabali mehmon Yaponiya Bosh vaziri Shigeru Isibaning samimiy salomi hamda O‘zbekiston Mustaqillik bayrami munosabati bilan yo‘llagan tabriklarini yetkazdi.
Suhbat chog‘ida O‘zbekiston va Yaponiya o‘rtasidagi strategik sheriklik munosabatlarini yanada mustahkamlash va ko‘p qirrali hamkorlikni kengaytirish masalalari atroflicha muhokama qilindi. O‘zaro muloqotlar faol yo‘lga qo‘yilgani hamda amaliy hamkorlik izchil rivojlanib borayotgani mamnuniyat bilan qayd etildi.
Shu munosabat bilan bugun ikki davlat tashqi ishlar vazirlari darajasida ilk bor o‘tkazilgan Strategik muloqot yig‘ilishi yuqori baholandi.
Bugungi kunda ikki tomonlama savdo hajmi ortib bormoqda, Yaponiya kompaniyalari ishtirokida yirik investitsiya loyihalari amalga oshirilmoqda. Shuningdek, 17-avgust kuni Osaka shahrida “EXPO 2025” butunjahon ko‘rgazmasi doirasida o‘tkazilgan O‘zbekiston milliy kuni muvaffaqiyatli o‘tgani ta’kidlandi.
Uchrashuvda siyosiy muloqotni chuqurlashtirish, savdo-iqtisodiy, investitsiyaviy, moliyaviy-texnik hamda madaniy-gumanitar sohalarda aniq loyihalarni ilgari surishga alohida e’tibor qaratildi.
Bundan tashqari, O‘zbekiston-Yaponiya markazi faoliyatini kengaytirish va kelgusida uning negizida Yaponiya yetakchi universitetlari ishtirokida qo‘shma universitet tashkil etish rejalari qo‘llab-quvvatlandi.
Shuningdek, xalqaro va mintaqaviy ahamiyatga molik masalalar, jumladan, “Markaziy Osiyo + Yaponiya” formatidagi bo‘lajak sammitni o‘tkazish yuzasidan ham fikr almashildi.
