Tezlikni oshirgan vazir jarimaga tortildi
U tezlikni 225 km/soatgacha oshirgani maʼlum bo‘ldi.
Turkiya transport vaziri Abdulqodir O‘rolo‘g‘li avtomobilida tezlikni oshirgani uchun jarima to‘ladi. Bu haqda mahalliy OAV xabar berdi.
Maʼlumotlarga ko‘ra, vazir avtomashinani boshqarayotganda tezlik meʼyoridan oshgan. Voqea ijtimoiy tarmoqlarda muhokamaga sabab bo‘lganidan so‘ng, u politsiyaga o‘zi murojaat qilib, jarima to‘laganini maʼlum qildi.
O‘rolo‘g‘li X ijtimoiy tarmog‘ida Anqara–Nig‘de yo‘li bo‘ylab safar vaqtidagi videoni eʼlon qildi. Unda avtomobil tezligi 225 km/soatga yetgani ko‘rinadi, holbuki qonun bo‘yicha bu yo‘lda cheklov 140 km/soat.
Videolavha tezda tarqaldi va yo‘l harakati xavfsizligi uchun masʼul amaldorning bunday xatti-harakati keng tanqidga uchradi.
O‘rolo‘g‘lining aytishicha, u shaxsan politsiyaga borib, qoidabuzarlikni tan olgan va 9267 lira (230 dollar) miqdorida jarima to‘lagan. Shuningdek, u qonun barcha uchun teng ekanini, vazirlar ham istisno emasligini taʼkidladi.
