Avstriyada 14 yoshgacha bo'lgan qizlarga hijob taqiqlanishi mumkin
Yangi tartib o‘quvchilarga psixologik yordam va ota-onalar bilan suhbatlarni ham o‘z ichiga oladi.
Avstriya hukumati joriy yilning kuzidan boshlab 14 yoshgacha bo‘lgan o‘quvchi qizlar uchun maktablarda hijob kiyishni taqiqlash bo‘yicha qonuniy tashabbusni ilgari surmoqda.
Bu haqda mamlakat Yoshlar, oila, Yevropa Ittifoqi va integratsiya vaziri Klaudiya Plakolm APA axborot agentligiga bergan izohida ma’lum qildi.
Vazirning ta’kidlashicha, mazkur qaror diniy e’tiqod masalasidan ko‘ra, yosh bolalar uchun “ro‘molning o‘rni yo‘qligi” bilan izohlanmoqda. Shuningdek, u Islom dinida ham balog‘atga yetmagan qizlar uchun hijob majburiyati mavjud emasligini qayd etdi.
Plakolmning ma’lum qilishicha, qonuniy taqiq joriy etilishi bilan birga, o‘quvchilarga psixologik yordam ko‘rsatish, zarurat bo‘lsa, ota-onalar bilan suhbat o‘tkazish ham ko‘zda tutilgan. Bundan tashqari, maktablar bolalar va yoshlarni himoya qilish bo‘yicha agentliklarni ham jalb etishi mumkin.
Eslatib o‘tamiz, iyun oyi oxirida Qozog‘iston prezidenti Qosim-Jomart To‘qayev ham jamoat joylarida yuzni tanib olishga to‘sqinlik qiluvchi kiyimlarni, jumladan hijobni taqiqlovchi qonunni imzolagan edi. Rasmiylar bu chorani xavfsizlikni ta’minlash nuqtayi nazaridan izohlashgan.
