Eronda turkcha ism qo‘yilgan chaqaloqqa guvohnoma berilmadi
Oila sudga murojaat qilgan bo‘lsa-da, ish hali ko‘rib chiqilmagan.
“Free Iran” kanalining xabar berishicha, Eronning Julfa shahrida yangi tug‘ilgan chaqaloqqa turkcha ism qo‘yilgani bois tug‘ilganlik guvohnomasi rasmiylashtirilmagan. Oila farzandiga Alixon ismini tanlagan, biroq Fuqarolik holati dalolatnomalarini qayd etish bo‘limi mazkur ismni tizimda mavjud emasligi va “turk-arab kelib chiqishli” ekani sababli ro‘yxatdan o‘tkazishni rad etgan.
Chaqaloq 2-iyun kuni dunyoga kelgan bo‘lsa-da, oradan 85 kun o‘tgach ham hujjatlar rasmiylashtirilmagan. Shu sababli bolaga emlash va boshqa zarur tibbiy xizmatlar ko‘rsatishning imkoni yo‘q. Ota-onalar mazkur qarordan norozi bo‘lib sudga murojaat qilgan, biroq jarayon hali boshlanmagan.
Eslatib o‘tamiz, Eron Prezidenti Masud Pezeshkian avvalroq turkcha ismlar bo‘yicha taqiqlarni bekor qilishni topshirgan edi. Bunga ozarbayjon turklari tomonidan boshlangan “Boboning ismi” va “Chaqaloq nomi” kabi aksiyalar sabab bo‘lgan. Mazkur tashabbuslar doirasida 15 mingdan ortiq fuqaro petitsiya imzolagan va turkcha ismlarga ruxsat berilishini so‘ragan.
Shunga qaramay, ayrim hududlarda hali ham turkcha ismlar ro‘yxatga olinmayotgani kuzatilmoqda.
