Rossiyada kameralar odamlarning millatini aniqlay boshladi
Sankt-Peterburgda 50 ming kamera odamlarning umumiy etnik xususiyatlarini farqlay oladigan texnologiya bilan jihozlandi.
Sankt-Peterburg shahrida yuzni aniqlash texnologiyasiga ega bo‘lgan videokuzatuv kameralar yangi funksiyalar bilan jihozlandi. Axborot texnologiyalari qo‘mitasi rahbari o‘rinbosari Igor Nikonovning ma’lum qilishicha, 2025-yil mart oyidan boshlab 50 mingga yaqin kamera insonlarning Kavkaz, Sharqiy Osiyo, Markaziy Osiyo, Osiyo va Yevropa qiyofasi, shuningdek, negroid irqiga xos belgilarini farqlash imkoniyatiga ega bo‘ldi.
Rasmiylarning qayd etishicha, ushbu tizim millatni aniq aniqlay olmaydi, balki faqat umumiy etnik belgilarni ajrata oladi. Mazkur imkoniyat huquqni muhofaza qiluvchi organlarga migrantlar klasterlarini aniqlash, noqonuniy yashash joylarini kuzatishda yordam berishi ko‘zda tutilgan.
Shu bilan birga, qo‘mita vakillari tajriba natijalari haqida yakuniy xulosa chiqarish uchun hali erta ekanini ta’kidlashdi. Jinoyatlarning ochilishi va kuzatuv samaradorligi bo‘yicha statistik ma’lumotlar yil oxirida e’lon qilinadi.
Mazkur tashabbus 2025-yil fevralida ko‘tarilgan bo‘lib, davlat idoralari o‘rtasida keng muhokama va bahslarga sabab bo‘lgan edi.
