O‘zbekiston oliy harbiy ta’lim muassasalarida “Vatanga qasamyod” marosimlari bo‘lib o‘tdi

Bugun, 1-sentabr kuni joriy yilda Mudofaa vazirligi oliy harbiy taʼlim muassasalariga oʻqishga qabul qilingan birinchi bosqich kursantlarining tantanali “Vatanga qasamyod” tadbirlari boʻlib oʻtdi.

 

Xususan, erta tongdan O‘zbekiston Respublikasi harbiy xavfsizlik va mudofaa universitetida mazkur oliy harbiy taʼlim muassasasiga yangi qabul qilingan kursantlar Vatanga qasamyod qabul qildi.

 

Tantanali tadbirlarda mudofaa vaziri general-leytenant Shuxrat Xalmuxamedov, Mudofaa vazirligi Jamoatchilik kengashi a’zolari, harbiy xizmatchilar, ota-onalar va kursantlar ishtirok etdi. So‘zga chiqqanlar kursantlarni ona Vatanni qoʻriqlash kabi sharafli kasbni egallash yoʻlidagi ilk qadamlari bilan qutladi.

 

Shuningdek, O‘zbekiston Respublikasi harbiy xavfsizlik va mudofaa universitetining Quruqlikdagi qo‘shinlar institutida ham kursantlar Vatanga qasamyod keltirish uchun saf tortdi.

 

Shu bilan birga, Harbiy aviatsiya instituti, Axborot-kommunikatsiya texnologiyalari va aloqa harbiy instituti hamda Harbiy tibbiyot institutida ham “Vatanga qasamyod” tantanalari yuqori saviyada oʻtkazildi.

 

Institutlarda o‘tkazilgamn marosimlarda keng jamoatchilik vakillari yurtimizda harbiy xizmatchilar uchun yaratilayotgan sharoitlar, ularning ijtimoiy himoyasi yoʻlidagi islohotlar haqida gapirar ekan, barchaning oʻqish va keyingi xizmatlariga muvaffaqiyatlar tiladi.

 

Kursantlar davlatimizning muqaddas ramzi boʻlgan bayroqni oʻpib, buyuk ajdodlarning pok ruhlari oldida, Vatani oldidagi burchini halol bajarishga bel bogʻlab, vijdoni, or-nomus va shaʼnini oʻrtaga qoʻyib, Oʻzbekiston Respublikasiga, xalqiga va Prezidentiga bir umr sodiq boʻlishga, har qanday mashaqqatli sinov va qiyinchiliklarda ham el-yurtining yuksak ishonchini oqlashga yaqinlari va keng jamoatchilik guvohligida tantanali ravishda ont ichdi.

 

Mudofaa vazirligi Axborot va ommaviy kommunikatsiyalar departamenti