Shavkat Mirziyoyev ShHT davlat rahbarlari kengashi majlisida ishtirok etdi

O‘zbekiston Respublikasi Prezidenti Shavkat Mirziyoyev 1-sentabr kuni Tyanjin shahrida o‘tkazilgan Shanxay hamkorlik tashkiloti (ShHT) Davlat rahbarlari kengashining navbatdagi majlisida ishtirok etdi. Tadbirga Xitoy Xalq Respublikasi Raisi Si Szinpin raislik qildi.

 

Sammitda ShHT doirasida ko‘p tomonlama hamkorlikni yanada rivojlantirish, tashkilot faoliyatini takomillashtirish istiqbollari hamda mintaqaviy va xalqaro ahamiyatga ega masalalar muhokama qilindi.

 

Xitoy Raisi Si Szinpin Prezident Shavkat Mirziyoyev va xalqimizni Mustaqillik kuni bilan tabriklab, O‘zbekistonning izchil taraqqiyotini yuksak baholadi.

 

Davlatimiz rahbari o‘z nutqida global noaniqlik sharoitida ShHT davlatlari o‘rtasidagi o‘zaro ishonch va birdamlikning muhimligini ta’kidladi. U tashkilot faoliyatining samaradorligini oshirish, yangi a’zolarni jalb qilish, xavfsizlik, iqtisodiy hamkorlik, transport-logistika, yashil transformatsiya va madaniy aloqalarni kengaytirishga oid qator tashabbuslarni ilgari surdi.

 

Xususan, yadroviy xavfsizlik bo‘yicha deklaratsiya qabul qilish, “ShHT – Afg‘oniston” muloqot guruhini qayta faollashtirish, savdo- iqtisodiy aloqalarni rivojlantirish, “ShHT yagona transport makoni” konsepsiyasini ishlab chiqish, “ShHT universiteti” onlayn kampusini yaratish, xalq ijodi festivallari, turizm va tibbiyot sohasidagi loyihalarni amalga oshirish taklif qilindi.

 

Sammit yakunida Tyanjin deklaratsiyasi, ShHTni 2035-yilgacha rivojlantirish strategiyasi hamda ko‘plab muhim ko‘p tomonlama hujjatlar imzolandi.