O‘zbekiston va Xitoy o‘rtasida keng qamrovli hujjatlar to‘plami imzolandi
Imzolangan hujjatlar davlatlar o'rtasidagi munosabatlarni strategik sheriklikning yangi darajasiga olib chiqadi.
Pekin shahrida O‘zbekiston Respublikasi Prezidenti Shavkat Mirziyoyev hamda Xitoy Xalq Respublikasi Raisi Si Szinpin o‘rtasida o‘tgan oliy darajadagi muzokaralar yakunida ikki tomonlama hujjatlarni almashish marosimi bo‘lib o‘tdi.
Tashrif doirasida qator muhim hujjatlar imzolandi, jumladan:
“O‘zbekiston – 2030” strategiyasi va “Bir makon, bir yo‘l” tashabbusini uyg‘unlashtirish bo‘yicha hamkorlik dasturi;
Madaniyat markazlarini o‘zaro tashkil etish to‘g‘risida bitim;
Tibbiy xizmatlar sohasida hamkorlik to‘g‘risida bitim.
Shuningdek, ikki tomonlama aloqalarni yanada rivojlantirishga xizmat qiluvchi boshqa qator kelishuvlar ham imzolandi. Jumladan:
O‘zbekistonga zemsnaryad texnikalari yetkazib berish loyihasining ikkinchi bosqichini amalga oshirish;
Texnik-iqtisodiy hamkorlik to‘g‘risida;
Mahsulotlar muvofiqligini baholash sohasida hamkorlik to‘g‘risida;
O‘zbekistondan Xitoyga qovun va bodom eksporti bo‘yicha fitosanitariya talablarini belgilash;
Kosmik fan va texnologiyalar sohasida tinchlik maqsadlarida hamkorlik to‘g‘risida;
Raqobat siyosati sohasida hamkorlik to‘g‘risida;
Inson resurslarini rivojlantirish bo‘yicha hamkorlikni kuchaytirish;
Raqamli iqtisodiyot yo‘nalishida sheriklikni rivojlantirish;
Samarkand viloyati va Tyanjin shahri o‘rtasida sheriklik munosabatlari o‘rnatish to‘g‘risida bitim;
O‘zbekiston Savdo-sanoat palatasi va Xitoy Xalqaro savdoga ko‘maklashish kengashi o‘rtasida hamkorlik to‘g‘risida kelishuv.
Mazkur hujjatlar O‘zbekiston va Xitoy o‘rtasidagi strategik sheriklikni yangi bosqichga olib chiqib, siyosiy, iqtisodiy va madaniy sohalardagi hamkorlikni yanada mustahkamlashga xizmat qiladi.
