O‘zbekistonda shakar ishlab chiqarish keskin kamaydi

O‘zbekistonda shakar ishlab chiqarish hajmi sezilarli darajada qisqardi. Davlat statistika qo‘mitasi ma’lumotlariga ko‘ra, 2025-yilning yanvar–iyun oylarida 165,5 ming tonna shakar ishlab chiqarilgan. Bu o‘tgan yilning mos davriga nisbatan 62 ming tonnaga kam.

 

So‘nggi uch yil ichida shakar ishlab chiqarish bosqichma-bosqich kamayib bormoqda: 2023-yilda 332,6 ming tonna, 2024-yilda esa 227,8 ming tonna shakar ishlab chiqarilgan edi. Import hajmida ham pasayish kuzatilmoqda. 2025-yilning 1-may holatiga ko‘ra, mamlakatga 223,9 million dollarlik shakar va konditer mahsulotlari import qilingan — bu o‘tgan yilga nisbatan 25,9 foiz kam.

 

Birja ma’lumotlariga ko‘ra, 11–17-avgust kunlari 3 146 tonna shakar sotilgan, kunlik o‘rtacha savdo hajmi esa 629 tonnani tashkil qilgan. Shu davrda birja narxlari 12 720–12 870 so‘m atrofida bo‘lgan. Mutaxassislar ichki bozor ta’minoti qisqarishi fonida narxlarning oshishi, noqonuniy savdo holatlarining kuchayishi va spekulyativ narx belgilash xavfi borligini ta'kidlashmoqda.

 

Ekspertlarga ko'ra, ishlab chiqarish va importning qisqarishi qandolat, ichimlik, non va konservalar kabi ko‘plab mahsulotlar tannarxiga ham ta’sir ko‘rsatadi. Bu esa oziq-ovqat bozorida narxlarning o‘sishiga olib kelishi, bozorning importga yanada ko‘proq qaram bo‘lishiga sabab bo‘lishi mumkin.