Shavkat Mirziyoyev Pekinda harbiy parad marosimida ishtirok etdi
Tadbirga yigirmadan ortiq davlat rahbarlari va delegatsiyalari tashrif buyurdi.
Shavkat Mirziyoyev 3-sentabr kuni Xitoy Xalq Respublikasiga rasmiy tashrifi doirasida Pekin shahrining markaziy maydoni – Tyananmen maydonida bo‘lib o‘tgan Ikkinchi jahon urushida Qozonilgan G‘alabaning 80 yilligiga bag‘ishlangan tantanali harbiy parad marosimida ishtirok etdi.
Mazkur tadbirga yigirmadan ortiq davlat rahbarlari va rasmiy delegatsiyalar, jumladan Rossiya, Belarus, Ozarbayjon, Qozog‘iston, Qirg‘iziston, Mo‘g‘uliston, Tojikiston, Turkmaniston, Eron, Vetnam, Misr va boshqa mamlakatlar yetakchilari tashrif buyurdi.
Xitoy Xalq Respublikasi Raisi Si Szinpin o‘z nutqida tarixiy xotirani asrab-avaylash, tinchlikni mustahkamlash va adolatni ta’minlash bugungi sharoitda dolzarb vazifa ekanini alohida ta’kidladi.
Paradda Xitoy xalq ozodlik armiyasining 45 ta bo‘linmasi ishtirok etib, mamlakat mudofaa sanoati tomonidan ishlab chiqarilgan zamonaviy raketa tizimlari, zirhli texnikalar, harbiy aviatsiya va uchuvchisiz uchish apparatlarining eng so‘nggi namunalari namoyish qilindi.
Ma’lumot o‘rnida, Pekinda bunday harbiy paradlar 1949-yildan buyon o‘tkazib kelinadi. Oxirgi katta ko‘rik 2019-yil 1-oktabrda o‘tkazilgan bo‘lib, unda 15 mingga yaqin harbiy xizmatchi qatnashgan edi.
O‘zbekiston Prezidentining Pekindagi tantanali marosimda ishtiroki mamlakatimizning xalqaro maydonda tinchlik, barqaror taraqqiyot va farovonlik yo‘lida do‘stlik, hamkorlik hamda o‘zaro anglashuvni mustahkamlashga qaratilgan izchil tashqi siyosatining yaqqol tasdig‘i bo‘ldi.
