Shavkat Mirziyoyev Sankt-Peterburg gubernatori Aleksandr Beglovni qabul qildi

Shavkat Mirziyoyev 10-sentabr kuni Sankt-Peterburg shahri gubernatori Aleksandr Beglov boshchiligidagi Rossiya delegatsiyasini qabul qildi.

 

Muloqot chog‘ida O‘zbekiston–Rossiya o‘rtasidagi hamkorlikni yanada rivojlantirish masalalari, jumladan, Sankt-Peterburg bilan iqtisodiy kooperatsiya loyihalari va madaniy-gumanitar almashinuv dasturlari muhokama qilindi.

 

O‘tgan yil yakunlariga ko‘ra, hududlar darajasida o‘zaro tovar ayirboshlash hajmi 20 foizga oshgani mamnuniyat bilan qayd etildi. Toshkentda Ishbilarmonlik markazi faoliyatini yo‘lga qo‘yish, shuningdek, Yangi Toshkent hududida “Peterburg mavzesi”ni barpo etish loyihasi ustida ishlar olib borilmoqda.

 

Uchrashuv doirasida metallurgiya, uskunasozlik, yo‘l qurilishi, farmatsevtika va sog‘liqni saqlash, oziq-ovqat sanoati, qishloq xo‘jaligi, logistika hamda boshqa yo‘nalishlarda 23 ta qo‘shma loyiha bo‘yicha “yo‘l xaritasi” imzolandi.

 

Shuningdek, xususiy tibbiyot, ta’lim, kommunal xo‘jalik, raqamli texnologiyalar, migratsiya va turizm sohalarida amaliy hamkorlikni kengaytirish bo‘yicha takliflar qo‘llab-quvvatlandi.

 

Tomonlar faol gumanitar aloqalarni davom ettirish, qo‘shma madaniy tadbirlarni muntazam o‘tkazishga alohida e’tibor qaratdilar. Shu bilan birga, joriy yilning oktyabr oyida ikki mamlakat hududlari kengashining ikkinchi yig‘ilishini samarali o‘tkazishga doir chora-tadbirlar kelishib olindi.