Shavkat Mirziyoyev Qatar Amiri bilan telefon orqali muloqot qildi
O‘zbekiston rahbari Isroilning Doha shahriga qilgan raketa hujumlarini qoralab, bunday harakatlar xalqaro huquqqa zid ekanini ta’kidladi.
12-sentabr kuni O‘zbekiston Respublikasi Prezidenti Shavkat Mirziyoyev Qatar Davlati Amiri Shayx Tamim bin Hamad Ol Soniy bilan telefon orqali muloqot qildi.
Suhbat chog‘ida ikki mamlakat o‘rtasidagi strategik sheriklik va ko‘p qirrali hamkorlik munosabatlarini yanada rivojlantirishning dolzarb masalalari ko‘rib chiqildi.
Davlatimiz rahbari muloqot avvalida yaqinda Isroil tomonidan Qatar poytaxti Doha shahriga uyushtirilgan raketa zarbalarini keskin qoraladi. Qatarning mustaqilligi va suverenitetini buzuvchi, uning xavfsizligiga tahdid soluvchi bunday harakatlar xalqaro huquq me’yorlariga hamda Birlashgan Millatlar Tashkiloti Nizomiga zid ekani alohida ta’kidlandi.
O‘zbekiston xalqaro munosabatlarda kuch ishlatishning har qanday shakliga qarshi ekani va Yaqin Sharqda vaziyatning yanada keskinlashuviga yo‘l qo‘ymaslik muhimligi qayd etildi.
Shu munosabat bilan Prezident Shavkat Mirziyoyev Qatar tashabbusi bilan chaqirilayotgan navbatdan tashqari arab-islom sammitining samarali o‘tishini tiladi.
Qatar Davlati Amiri, o‘z navbatida, ko‘rsatilgan birdamlik va qo‘llab-quvvatlov uchun chuqur minnatdorlik bildirdi.
Muloqot davomida ikki davlat o‘rtasida faol siyosiy muloqotni davom ettirish, yetakchi kompaniyalar o‘rtasida qo‘shma investitsiya va kooperatsiya loyihalarini jadallashtirish masalalari ham muhokama qilindi.
