Tramp O‘zbekistonga kelishi mumkin

AQSh prezidenti Donald Trampning Markaziy Osiyoga tashrif buyurishi ehtimoli yuzasidan muhokamalar kuchaymoqda. 7 sentabr kuni Oq uy yonidan US Open tennis musobaqasiga yo‘l olayotganda Trampga Qozog‘istonga borish rejalari haqida savol berilganida, u “Ehtimol. U yaxshi inson, salom ayting” deya javob qaytargan. Biroq Tramp Qozog‘iston yoki prezident Qosim-Jo‘mart To‘qayev nomini aniq tilga olmagan.

 

Shu bilan birga, 5 sentabr kuni Tramp va O‘zbekiston prezidenti Shavkat Mirziyoyev o‘rtasida telefon orqali suhbat bo‘lib o‘tgan edi. Unda Mirziyoyev AQSh prezidentini O‘zbekistonga “qulay vaqtda” tashrif buyurishga taklif qilgan. Vashingtondagi manbalarga ko‘ra, hozircha Markaziy Osiyoga rasmiy safar bo‘yicha yakuniy qaror qabul qilinmagan.

 

O‘zbekiston Trampning ikkinchi prezidentlik muddatida Oq uy bilan faol muloqot o‘rnatishga intilayotgan eng faol davlat sifatida ko‘rilmoqda. Aprel oyida tashrif buyurgan tashqi ishlar vaziri Baxtiyor Saidov boshchiligidagi delegatsiya Vashingtonga rasmiy taklif topshirgan, Tramp esa Mirziyoyev bilan telefon orqali ham iqtisodiy hamkorlik, xususan, muhim minerallar masalasini muhokama qilgan.

 

Qozog‘iston ham AQSh bilan aloqalarni mustahkamlash tarafdori bo‘lsa-da, ayrim savdo masalalarida kelishmovchiliklar saqlanib qolmoqda. Shu bois Trampning qisqa izohi qo‘shni davlat matbuotida katta muhokamalarga sabab bo‘lgan bo‘lsa-da, uning qaysi mamlakatga safar qilishi hanuz noaniq.

 

Markaziy Osiyo hali hech bir AQSh prezidenti tomonidan rasmiy safar bilan ziyorat qilinmagan yagona mintaqa hisoblanadi. Agar Tramp tashrifni amalga oshirsa, u Fransiya, Germaniya va Italiya rahbarlaridan keyin mintaqaga yo‘l olgan navbatdagi G‘arb yetakchisiga aylanadi.