Qirg‘iziston sobiq prezidentining oilasi uydan majburan chiqarildi
Sud qaroriga muvofiq, sobiq prezident Almazbek Atambayevning mol-mulki, jumladan, Qo‘y-Toshdagi uy musodara qilindi.
Qirg‘iziston Davlat mulkini boshqarish agentligi ma’lum qilishicha, sud qarori asosida sobiq prezident Almazbek Atambayevning oilasi yashab kelgan Chuy viloyatining Alamudin tumaniga qarashli Qo‘y-Tosh qishlog‘idagi uy va yer maydoni davlat tasarrufiga qaytarildi. Sobiq prezident Almazbek Atambayevning oilasi Qo‘y-Tosh qishlog‘idagi uyidan majburan chiqarib yuborilmoqda.
Agentlik vakillarining ta’kidlashicha, ushbu hudud endilikda ijtimoiy ehtiyojlarga xizmat qiladigan obyektlarga ajratiladi. Rejalarga ko‘ra, u yerda qariyalar uyi va bolalar bog‘chasi qurilishi belgilangan.
Ma’lumot uchun 2025-yil 3-iyun kuni Bishkek shahrining Birinchi May tuman sudi Almazbek Atambayevni 11 yil 6 oy muddatga ozodlikdan mahrum qilish haqidagi hukmni e’lon qilgan. Shu bilan birga, sud qaroriga ko‘ra, sobiq prezidentning bir qator mol-mulklari, jumladan Qo‘y-Toshdagi uyi musodara qilinib, davlat mulkiga o‘tkazilgan.
Eslatib o‘tamiz, Almazbek Atambayev Qirg‘izistonning 2011–2017-yillarda davlat rahbari bo‘lgan. U prezidentlikdan ketganidan keyin ham faol siyosiy maydonda qolgan va turli jinoyat ishlarida gumonlanuvchi sifatida tilga olingan.
