O‘zbekiston va BMT strategik sheriklikni yangi bosqichga olib chiqadi
Shavkat Mirziyoyev Nyu-Yorkda BMT Bosh kotibi Antoniu Guterrish bilan uchrashib, keng qamrovli sheriklikni yanada rivojlantirish masalalarini muhokama qildi.
23-sentabr kuni Nyu-York shahrida BMT Bosh Assambleyasining 80-sessiyasi doirasida O‘zbekiston Respublikasi Prezidenti Shavkat Mirziyoyev BMT Bosh kotibi Antoniu Guterrish bilan uchrashuv o‘tkazdi.
Muloqotda Barqaror rivojlanish maqsadlariga erishish bo‘yicha milliy vazifalar doirasida BMT bilan hamkorlikni kengaytirish masalalari muhokama qilindi. Prezident Shavkat Mirziyoyev Antoniu Guterrishni BMTning yubiley sessiyasi bilan tabriklab, tashkilot tizimini zamonaviy jarayonlarga mos ravishda isloh qilish tashabbuslarini qo‘llab-quvvatladi.
Uchrashuvda O‘zbekiston va BMT o‘rtasida hamkorlik misli ko‘rilmagan yuqori darajaga chiqqani ta’kidlandi. Bugungi kunda 160 dan ortiq dastur va loyihalar muvaffaqiyatli amalga oshirilmoqda. Yaqin kunlarda besh yillik yangi Hamkorlik dasturi imzolanishi kutilmoqda.
O‘zbekiston tashabbusi bilan BMT Bosh Assambleyasining 13 ta rezolyutsiyasi qabul qilingan. Mamlakatimiz BMTning bir qator nufuzli tuzilmalariga – ECOSOC, Inson huquqlari bo‘yicha qo‘mita, Statistika komissiyasiga a’zo etib saylandi.
Shuningdek, 24-sentabr kuni BMT bosh qarorgohida bolalar saratoni va boshqa og‘ir kasalliklarga qarshi kurashish bo‘yicha yuqori darajadagi forum o‘tkazilishi rejalashtirilmoqda. O‘z navbatida, Samarqand shahrida UNESCOning 43-Bosh konferensiyasiga ham qizg‘in tayyorgarlik ishlari olib borilmoqda.
BMT Bosh kotibi Antoniu Guterrish Prezident Shavkat Mirziyoyevning Bosh Assambleyadagi nutqini yuksak baholab, unda ilgari surilgan barqaror rivojlanish, sun’iy intellekt, yoshlar, madaniyatlararo muloqot va boshqa sohalardagi tashabbuslarning global ahamiyatini alohida qayd etdi.
Uchrashuv yakunida ustuvor yo‘nalishlarda keng ko‘lamli sheriklikni rivojlantirish, hamkorlikning yangi dastur va loyihalarini ishlab chiqish bo‘yicha kelishuvga erishildi.
