Tramp Netanyaxuni “negativchi” deb atadi
U Netanyaxuning sovuqqonligini tanqid qildi.
AQSH prezidenti Donald Tramp Isroil bosh vaziri Benyamin Netanyaxuga G‘azo bo‘yicha tinchlik rejasi muhokamasi chog‘ida qo‘pol ibora bilan murojaat qilgan. Bu haqida Axios nashri AQSH hukumatidagi manbaga tayangan holda xabar berdi.
Ma’lumotlarga ko‘ra, 3-oktabr kuni Hamas vakillari Trampning tinchlik rejasi bo‘yicha taklifini shartli ravishda ijobiy qabul qilganida, Tramp buni muhim yutuq sifatida ko‘rib, Netanyaxuga qo‘ng‘iroq qilgan. Ammo Isroil bosh vaziri bu javobni sovuqqonlik bilan qabul qilib, bayram qilishga hali erta ekanini aytgan.
Netanyaxuning bu ohangi Trampni g‘azablantirgan va u Netanyaxuga: “Sen doimo juda salbiysan. Bu g‘alaba, uni qabul qil”, degan. Manbalar aslida Tramp yanada qo‘polroq so‘z ishlatganini qayd etmoqda.
Mutaxassislar fikricha, bu tortishuv Trampning G‘azo bo‘yicha tinchlik rejasi unga qanchalik muhim ekanini va uni o‘zining diplomatik yutug‘i sifatida ko‘rishga intilayotganini ko‘rsatadi.
Trampning rejasi 29-sentabr kuni, u va Netanyaxu Vashingtonda uchrashganidan so‘ng e’lon qilingan edi. 20 banddan iborat hujjatda barcha isroillik garovdagilarni ozod qilish, Hamasning taslim bo‘lishi, G‘azoga insonparvarlik yordamini yetkazishga ruxsat berish hamda hududni vaqtincha xalqaro organlar nazoratidagi ma’muriyatga topshirish ko‘zda tutilgan.
Ammo Netanyaxu xavfsizlik kafolatlari va demilitarizatsiya masalalarida qo‘shimcha shartlarni ilgari surgani sababli tomonlar o‘rtasida keskinlik yuzaga kelgani qayd etilmoqda.
