O‘zbekistonlik Sergey Lebedev yana MDH rahbarligiga saylandi
Jizzaxda tug‘ilgan Lebedev 2007-yildan beri MDH Ijroiya qo‘mitasini boshqarib kelmoqda.
Dushanbeda 10-oktabr kuni bo‘lib o‘tgan Mustaqil Davlatlar Hamdo‘stligi (MDH) Davlat rahbarlari kengashi yig‘ilishida o‘zbekistonlik Sergey Lebedev uch yillik yangi muddatga MDH Ijroiya qo‘mitasi rahbari — Bosh kotibi lavozimiga qayta tayinlandi.
Yig‘ilishning tor doiradagi qismida qabul qilingan qarorga ko‘ra, Lebedevning vakolati yana uch yilga uzaytirildi. U o‘z nutqida davlat rahbarlariga bildirilgan ishonch uchun minnatdorlik bildirib, Hamdo‘stlik davlatlari o‘rtasida do‘stlik, barqarorlik va o‘zaro ishonch muhitini mustahkamlash yo‘lidagi faoliyatini davom ettirishini ta’kidladi.
Sergey Lebedev 1948-yil 9-aprelda Jizzax shahrida tug‘ilgan. U uzoq yillar davomida davlat xavfsizlik organlari va tashqi razvedka tizimida faoliyat yuritgan. 2000-yilda Rossiya tashqi razvedka xizmati direktori lavozimini egallagan.
Lebedev 2007-yildan beri MDH Ijroiya qo‘mitasini boshqarib kelmoqda. Uning vakolati ilgari ham bir necha bor — 2012, 2016, 2017, 2019 va 2022-yillarda uzaytirilgan.
Mazkur yig‘ilishda O‘zbekiston Prezidenti ham so‘zga chiqib, Hamdo‘stlik mamlakatlari o‘rtasida yosh mutaxassislar hamkorligini mustahkamlash, innovatsion startaplarni qo‘llab-quvvatlash hamda diplomlarni o‘zaro tan olish bo‘yicha yangi davlatlararo shartnoma ishlab chiqish tashabbusini ilgari surdi.
