AQShda “Markaziy Osiyo – AQSh” sammiti o‘tkazilishi mumkin
AQSh kongressmenlari Trampni C5+1 diplomatik formatining 10 yilligi munosabati bilan Markaziy Osiyo yetakchilari ishtirokida sammit o‘tkazishga chaqirdi.
AQSh Kongressi a’zolari Donald Trampni Markaziy Osiyo davlatlari ishtirokida yuqori darajadagi sammit o‘tkazishga chaqirdi.
Kongress a’zolari Sidni Kamlager-Dav va Bill Hyuizinga AQSh prezidenti Donald Tramp nomiga yo‘llagan murojaatlarida “Markaziy Osiyo – AQSh” (C5+1) diplomatik formatining 10 yilligi munosabati bilan Vashingtonda sammit tashkil etishni taklif qilishdi. Bu haqda Kamlager-Davning rasmiy saytida ma’lum qilingan.
“Mazkur sammitda prezident Trampning shaxsan ishtiroki C5+1 formatining 10 yilligini muhim diplomatik voqelikka aylantiradi va AQSh hamda Markaziy Osiyo o‘rtasidagi hamkorlikning keyingi o‘n yillikdagi yo‘nalishlarini belgilab beradi”, — deyiladi murojaatda.
Eslatib o‘tamiz, “Markaziy Osiyo – AQSh” (C5+1) formati 2015-yil noyabr oyida Samarqandda o‘tkazilgan tashqi ishlar vazirlarining birinchi uchrashuvidan so‘ng yo‘lga qo‘yilgan. Platforma AQSh hamda O‘zbekiston, Qozog‘iston, Qirg‘iziston, Turkmaniston va Tojikiston o‘rtasidagi muloqot va strategik hamkorlikni kuchaytirishga xizmat qiladi.
So‘nggi yillarda mazkur format doirasida energetika, xavfsizlik, iqlim o‘zgarishi va iqtisodiy barqarorlik masalalari muhokama qilinib kelinmoqda. 2023-yil sentabrida esa Nyu-Yorkda C5+1 formatidagi birinchi prezidentlar uchrashuvi o‘tkazilgan edi.
