Shavkat Mirziyoyev va Belgiya Qiroli Filipp Bryusselda muzokara o‘tkazdi

Bryussel shahriga rasmiy tashrif doirasida O‘zbekiston Respublikasi Prezidenti Shavkat Mirziyoyev Belgiya Qirolligi Qiroli Filipp bilan Laken saroyida uchrashuv o‘tkazdi.

 

Suhbat chog‘ida O‘zbekiston va Belgiya o‘rtasidagi savdo-iqtisodiy, investitsiyaviy hamda madaniy-gumanitar hamkorlikni yanada rivojlantirish masalalari muhokama qilindi. Shuningdek, xalqaro va mintaqaviy ahamiyatga ega dolzarb masalalar yuzasidan ham fikr almashildi.

 

Qirol Filipp O‘zbekiston rahbarining Yevropa Ittifoqi rahbariyati bilan muzokaralari natijalarini yuqori baholab, Kengaytirilgan sheriklik va hamkorlik to‘g‘risidagi tarixiy bitim imzolangani munosabati bilan samimiy tabrik so‘zlarini bildirdi.

 

Uchrashuvda ikki davlat o‘rtasidagi munosabatlarning izchil rivojlanib borayotgani, vazirlar darajasida faol muloqotlar yo‘lga qo‘yilgani, siyosiy maslahatlashuvlar muntazam o‘tkazilayotgani va parlamentlararo do‘stlik guruhlari faoliyat yuritayotgani qayd etildi.

 

Madaniy-gumanitar sohada hamkorlik mustahkamlanib bormoqda. Toshkent–Kortreyk va Samarqand–Lyej shaharlarida birodarlik aloqalari o‘rnatilgan, Kortreyk shahrida buyuk alloma Abu Ali ibn Sino byusti ochilgan.

 

Belgiya kompaniyalari O‘zbekistonda to‘qimachilik, logistika va xizmat ko‘rsatish sohalarida faoliyat yuritmoqda. O‘tgan yili Toshkentda Benilyuks mamlakatlari savdo palatasi ish boshladi.

 

Tomonlar yaqin kelajakda Belgiya ishbilarmonlari delegatsiyasining O‘zbekistonga tashrifini tashkil etish hamda madaniy almashinuv dasturlarini kengaytirish zarurligini ta’kidladilar.

 

Uchrashuv yakunida Prezident Shavkat Mirziyoyev Qirol Filippni rasmiy tashrif bilan O‘zbekistonga kelishga taklif etdi.