Shavkat Mirziyoyev UNESCO Bosh direktori Odri Azule bilan uchrashuv o‘tkazdi

 

Samarqand shahrida O‘zbekiston Respublikasi Prezidenti Shavkat Mirziyoyev BMTning Ta’lim, fan va madaniyat masalalari bo‘yicha tashkiloti (UNESCO) Bosh direktori Odri Azuleni qabul qildi. Uchrashuv davomida O‘zbekiston bilan UNESCO o‘rtasidagi ko‘p qirrali sheriklikni yanada rivojlantirish masalalari muhokama qilindi.

 

Odri Azule O‘zbekiston rahbarini UNESCO Bosh konferensiyasining 43-sessiyasini so‘nggi 40 yilda ilk bor tashkilotning Parijdagi bosh qarorgohi tashqarisida yuqori darajada tashkil etgani bilan tabrikladi. Konferensiya doirasida UNESCOning Maktabgacha ta’lim bo‘yicha mintaqaviy markazi ishga tushirilishi, Beruniy mukofoti g‘oliblarini taqdirlash marosimi, Samarqand shahrining 3000 yilligi munosabati bilan maxsus tadbir, shuningdek, muzeylar, sun’iy intellekt va gender mavzulari bo‘yicha forumlar o‘tkazilishi rejalashtirilgan.

 

So‘nggi yillarda O‘zbekiston va UNESCO o‘rtasidagi hamkorlik sezilarli darajada rivojlandi. Birgalikda bolalar ta’limi bo‘yicha butunjahon konferensiyasi o‘tkazildi, Parijda Beruniyning 1050 yilligi nishonlandi va buyuk alloma sharafiga xalqaro mukofot ta’sis etildi. O‘zbekistonning tashabbusi bilan UNESCOning uchta muhim rezolyutsiyasi qabul qilindi, shuningdek, tashkilotning maxsus ro‘yxatlariga O‘zbekistonning bir qator yangi obyektlari va madaniy qadriyatlari kiritildi.

 

Uchrashuv yakunida Prezident Shavkat Mirziyoyev Odri Azulega fan, ta’lim va madaniyat sohalaridagi aloqalarni rivojlantirishdagi xizmatlari hamda xalqimizning boy madaniy merosini keng ommalashtirishga qo‘shgan hissasi uchun “Do‘stlik” ordenini topshirdi.