O‘zbekiston va Finlyandiya o‘rtasida 1 milliard yevrolik loyihalar portfeli shakllantirildi
Ko‘ksaroyda Shavkat Mirziyoyev va Finlyandiya prezidenti Aleksandr Stubb rasmiy delegatsiyalar ishtirokida muzokara o‘tkazdi.
O‘zbekiston Respublikasi Prezidenti Shavkat Mirziyoyev va Finlyandiya Respublikasi Prezidenti Aleksandr Stubb Ko‘ksaroy qarorgohida bo‘lib o‘tgan uchrashuvda ikki davlat o‘rtasidagi siyosiy, savdo-iqtisodiy, investitsiyaviy va gumanitar sohalardagi hamkorlikni yanada chuqurlashtirish va kengaytirish istiqbollarini muhokama qildilar.
Muzokaralar davomida turli darajalardagi siyosiy muloqotlarning jadal rivojlanishi va biznes-sheriklikning faollashgani mamnuniyat bilan qayd etildi.
Ikkala tomon o‘zaro savdo hajmining izchil o‘sishini va iqtisodiy aloqalarning mustahkamlanishini ta’kidladilar. Hamkorlikning amaliy natijalari sifatida mamlakatimizda Xalqaro Nordik universitetining muvaffaqiyatli faoliyati va maktab ta’limi sohasidagi qo‘shma dasturlar misol qilib keltirildi. Yaqinda o‘tkazilgan O‘zbekiston – Finlyandiya biznes-forumi yopilish marosimida umumiy qiymati 1 milliard yevrodan ziyod bo‘lgan istiqbolli qo‘shma loyihalar portfeli shakllantirilgani e’lon qilindi.
Muhokamalarda, shuningdek, tovar ayirboshlashni karrasiga oshirish maqsadida Savdoni moliyalashtirish qo‘shma jamg‘armasini tashkil etish imkoniyatlari ko‘rib chiqildi. O‘zbekistonning qishloq xo‘jaligi va to‘qimachilik mahsulotlarini Yevropa Ittifoqi bozorlariga olib chiqish uchun sertifikatlash laboratoriyalarini ochish tashabbusi qo‘llab-quvvatlandi. Geologiya, energetika, agrosanoat, raqamlashtirish, sun’iy intellekt, ekologiya va turizm kabi bir qator muhim sohalarda hamkorlikni kengaytirishga alohida ahamiyat berildi.
2026-yilda Hukumatlararo komissiyaning navbatdagi yig‘ilishini o‘tkazish va Ishbilarmonlar kengashini ta’sis etish to‘g‘risida kelishuvlarga erishildi. Ta’lim, tibbiyot va mehnat migratsiyasi sohalaridagi hamkorlik masalalari ham ko‘rib chiqilib, kelgusi yilda birinchi Rektorlar va innovatsiyalar forumini o‘tkazish rejalashtirilgan. Prezidentlar, shuningdek, mintaqaviy va xalqaro dolzarb masalalar bo‘yicha o‘zaro fikr almashdilar.
