Qirg‘iziston Prezidenti Shavkat Mirziyoyev va o‘zbek xalqiga tabrik yo‘lladi
Sadiр Japarov UNESCO konferensiyasining 43-sessiyasi ilk marta Parijdan tashqarida Samarqandda bo‘lib o‘tayotgani Markaziy Osiyo uchun tarixiy ahamiyatga ega ekanligini qayd etdi.
Qirg‘iziston Prezidenti Sadiр Japarov qirg‘iz xalqi va o‘zi nomidan O‘zbekiston Prezidenti Shavkat Mirziyoyev va o‘zbek xalqini Samarqand shahrida UNESCO Bosh konferensiyasining 43-sessiyasining ochilishi bilan tabrikladi.
"Hurmatli Shavkat Miromonovich!
Markaziy Osiyo uchun tarixiy ahamiyatga ega bo‘lgan va qirq yildan ortiq vaqt ichida birinchi marta Parijdagi UNESCO bosh qarorgohidan tashqarida o‘tkazilayotgan ushbu muhim tadbir O‘zbekiston Respublikasining yuqori xalqaro mavqeyining,shuningdek, butun Markaziy Osiyo mintaqasining global miqyosda madaniy, ma'naviy va gumanitar hamkorlikning muhim markazi sifatida tobora tan olinishining yaqqol isboti bo‘lib xizmat qiladi.
Ilm-fan, ta'lim va ma'naviyat beshigi bo‘lgan qadimiy Samarqand shahrida bunday nufuzli forumning o‘tkazilishi konferensiyaga alohida ramziy ma'no bag‘ishlaydi. Bu O‘zbekistonning sivilizatsiyalar o‘rtasidagi ko‘prik va tinchlik, o‘zaro tushunish va ijodkorlik g'oyalarini jalb qilish markazi sifatidagi rolini ta'kidlaydi.
Ishonchim komilki, konferensiya davomida ilgari surilgan qarorlar va tashabbuslar ta'lim, fan va madaniyat sohasidagi hamkorlik uchun yangi ufqlarni ochadi, xalqlar o‘rtasidagi do‘stlikni mustahkamlashdek ezgu maqsadga xizmat qiladi va mintaqamizning yanada gulab-yashnashiga hissa qo‘shadi.
Qardosh o‘zbek xalqiga ushbu keng ko‘lamli va ahamiyatli tadbirda muvaffaqiyatlar, samarali muhokamalar, konstruktiv yechimlar va ilhomlantiruvchi natijalar tilayman", - deyiladi qardosh mamlakati rahbarining tabrigida.
