Shavkat Mirziyoyev 3–4-noyabr kunlari amaliy tashrif bilan Qatarga boradi
O‘zbekiston prezidenti Doha shahrida o‘tkaziladigan Ijtimoiy rivojlanish bo‘yicha II Jahon sammitida ishtirok etadi.
O‘zbekiston prezidenti Shavkat Mirziyoyev 3–4-noyabr kunlari amaliy tashrif bilan Qatar davlatiga boradi. Davlat rahbari Doha shahrida o‘tkaziladigan Ijtimoiy rivojlanish bo‘yicha II Jahon sammitida ishtirok etadi, deyiladi Prezident matbuot xizmati xabarida.
Mazkur nufuzli forum Qatar amiri Shayx Tamim bin Hamad Ol Soniy tashabbusi va taklifi bilan tashkil etilmoqda. Tashrif doirasida xalqaro hamkorlikni kengaytirish, ijtimoiy tengsizliklarni kamaytirish, barqaror rivojlanish va inklyuzivlikni ta’minlashga doir dolzarb masalalar muhokama qilinadi.
Sammit kun tartibidan quyidagi masalalar o‘rin olgan:
- ijtimoiy-iqtisodiy rivojlanishda farqlarni kamaytirish,
- Kopengagen deklaratsiyasi tamoyillariga sodiqlikni mustahkamlash,
- 2030-yilgacha Barqaror rivojlanish maqsadlariga erishish jarayonini jadallashtirish,
- milliy strategiyalarni takomillashtirish, ijtimoiy adolat, inklyuzivlik va jamiyat barqarorligini oshirish bo‘yicha kompleks tashabbuslarni amalga oshirish.
Forum davlatlar, xalqaro tashkilotlar, BMT institutlari, nodavlat sektor, ekspertlar va biznes vakillarini bir platformada jamlab, konstruktiv muloqotni kuchaytirishga xizmat qiladi.
Sammit yakunida inklyuziv ijtimoiy taraqqiyot bo‘yicha global hamkorlikni kuchaytirishga qaratilgan Doha deklaratsiyasi qabul qilinishi rejalashtirilgan.
