Shavkat Mirziyoyev Vashingtonda AQSH Eksimbanki rahbari bilan uchrashuv o‘tkazdi
O‘zbekiston va AQSH Eksimbanki o‘rtasida qo‘shma loyihalarni moliyalashtirish bo‘yicha bitim imzolandi.
O‘zbekiston Respublikasi Prezidenti Shavkat Mirziyoyev 6-noyabr kuni Vashington shahriga amaliy tashrifi doirasida AQSH Eksport-import banki (EXIM Bank) rahbari Jon Yovanovichni qabul qildi.
EXIM Bank — AQSH hukumatining rasmiy eksport-kredit agentligi bo‘lib, Amerika kompaniyalarining xalqaro iqtisodiy faoliyatini qo‘llab-quvvatlash, shuningdek, eksportni sug‘urtalash, kafolatlash va moliyalashtirish bo‘yicha xizmatlar ko‘rsatadi.
Uchrashuvda O‘zbekiston va EXIM Bank o‘rtasidagi hamkorlikni kengaytirish masalalari muhokama qilindi. Tomonlar tayyorlangan qo‘shma dastur doirasida energetika, muhim minerallar, transport, qishloq xo‘jaligi, axborot texnologiyalari va boshqa ustuvor yo‘nalishlarda yirik investitsiya loyihalarini moliyalashtirish imkoniyatlarini ko‘rib chiqdi.
Muloqot chog‘ida O‘zbekiston aviaparkini modernizatsiya qilish, “Boeing” samolyotlarini xarid qilish va yetkazib berish jarayonida EXIM Bankning ishtiroki alohida qayd etildi. Amaliy sheriklikni davom ettirish hamda uzoq muddatli hamkorlik strategiyasini ishlab chiqish bo‘yicha kelishuvga erishildi.
Uchrashuv yakunida O‘zbekiston Respublikasi Investitsiyalar, sanoat va savdo vazirligi hamda AQSH Eksimbanki o‘rtasida Qo‘shma loyihalarni moliyalashtirish to‘g‘risidagi bitim imzolandi va davlat rahbari huzurida tomonlar o‘rtasida hujjatlar almashildi.
