Shavkat Mirziyoyev Vashingtonda AQSh Kongressi vakillari bilan uchrashuv o‘tkazdi

Prezident Shavkat Mirziyoyev 5-noyabr kuni Vashington shahriga tashrifi doirasida AQSh Kongressi Vakillar palatasi a’zolari Bill Xayzenga, Kerol Miller va Sidni Kamlager-Davni qabul qildi.

 

Uchrashuvda O‘zbekiston va Amerika Qo‘shma Shtatlari o‘rtasidagi strategik sheriklikni yanada chuqurlashtirish, parlamentlararo muloqotni kengaytirish hamda amaliy hamkorlikni rivojlantirish masalalari muhokama qilindi.

 

Tomonlar qonun chiqaruvchi organlar o‘rtasidagi aloqalar so‘nggi yillarda sezilarli faollashganini qayd etdilar. Xususan, AQSh Kongressida O‘zbekiston bo‘yicha kokus samarali faoliyat yuritayotgani, kokus tashabbusi bilan har yili o‘tkazilayotgan “O‘zbekiston kunlari” ikki tomonlama munosabatlarni mustahkamlashga xizmat qilayotgani alohida e’tirof etildi.

 

Muloqot davomida Kongressning oliy darajada erishilgan kelishuvlarni, eng avvalo savdo-iqtisodiy, investitsiyaviy hamda madaniy-gumanitar yo‘nalishlardagi hamkorlikni kengaytirishga qaratilgan tashabbuslarni qo‘llab-quvvatlashi muhim ekani ta’kidlandi.

 

Hududlararo aloqalarni kuchaytirish masalasiga alohida e’tibor qaratildi. Jumladan, G‘arbiy Virjiniya, Michigan va Kaliforniya shtatlari bilan savdo, investitsiya, ta’lim va innovatsiyalar yo‘nalishlarida hamkorlikni yo‘lga qo‘yish istiqbollari ko‘rib chiqildi.

 

Uchrashuv yakunida AQSh Kongressi delegatsiyasining O‘zbekistonga tashrifini tashkil etish, shuningdek, ikki davlat hududlari rahbarlari hamda ishbilarmonlar delegatsiyalarining o‘zaro tashriflarini amalga oshirishga kelishib olindi.