Shavkat Mirziyoyev “C5+1” sammiti doirasida doimiy Kotibiyat tuzishni taklif qildi
O‘zbekiston rahbari “C5+1” sammitida savdo, investitsiya, energetika, qishloq xo‘jaligi va madaniyat yo‘nalishlarida hamkorlikni kengaytirishga qaratilgan tashabbuslar bilan chiqdi. Prezident navbatdagi sammitni Samarqandda o‘tkazish tashabbusini ilgari surdi.
O‘zbekiston Respublikasi Prezidenti Shavkat Mirziyoyev AQSH Prezidentining rasmiy qarorgohi – Vashington shahridagi Oq uyda bo‘lib o‘tgan Markaziy Osiyo mamlakatlari va AQSH yetakchilarining “C5+1” formatidagi sammitida ishtirok etdi.
AQSH Prezidenti Donald Tramp raisligida o‘tgan ushbu tadbirda Qozog‘iston Respublikasi Prezidenti Qasim-Jomart Toqayev, Qirg‘iz Respublikasi Prezidenti Sadir Japarov, Tojikiston Respublikasi Prezidenti Emomali Rahmon hamda Turkmaniston Prezidenti Serdar Berdimuhamedov qatnashdi.
Davlatimiz rahbari sammit tashkil etilgani uchun minnatdorlik bildirib, so‘nggi 10 yil davomida “C5+1” mexanizmi mintaqaviy savdo, transport va energetika aloqalarini mustahkamlashda samarali maydonga aylanganini qayd etdi. Mazkur uchrashuv Markaziy Osiyo va AQSH o‘rtasidagi strategik muloqotni yangi bosqichga ko‘tarishi alohida ta’kidlandi.
O‘zbekiston Prezidenti format doirasidagi hamkorlikni kengaytirish maqsadida bir qator tashabbuslarni ilgari surdi. Jumladan:
“C5+1” doirasida muntazam faoliyat yurituvchi Kotibiyatni tashkil etish;
davlat idoralari, kompaniyalar va moliya institutlari o‘rtasidagi tizimli muloqotni kuchaytirish uchun vazirlar darajasidagi Investitsiyalar va savdo bo‘yicha muvofiqlashtiruvchi kengash tuzish;
“Markaziy Osiyo investitsiyaviy sherikligi” jamg‘armasini ishga tushirish;
mintaqani Janubiy Kavkaz va Yevropa bilan bog‘lovchi yirik transport-kommunikatsiya va energetika loyihalarini amalga oshirishda AQSH bilan hamkorlikni kuchaytirish.
Shuningdek, muhim minerallarni izlash, qazib olish va chuqur qayta ishlashni muvofiqlashtirish hamda tayyor mahsulotlarni global yetkazib berish zanjirlariga integratsiya qilish uchun Maxsus qo‘mita tuzish taklif qilindi.
Qishloq xo‘jaligini zamonaviy Amerika texnologiyalari asosida modernizatsiya qilish maqsadida Mintaqaviy agrotexnologik innovatsiyalar sherikligini yaratish tashabbusi ilgari surildi.
Gumanitar sohada esa AQSHning yetakchi muzeylarida Markaziy Osiyo davlatlarining boy madaniy merosiga bag‘ishlangan qo‘shma ko‘rgazmalar tashkil etish taklif qilindi.
Davlatimiz rahbari navbatdagi “C5+1” sammitini Samarqand shahrida o‘tkazishni taklif etdi.
Tadbir yakunida ko‘p tomonlama hujjatlar imzolandi.
