Shavkat Mirziyoyev Trampga rasmiy tashrif bilan O‘zbekistonga kelishni taklif etdi
O‘zbekiston va AQSH rahbarlari Oq uyda muzokara o‘tkazib, strategik sheriklikni yangi bosqichga ko‘tarish masalalarini ko‘rib chiqdi.
O‘zbekiston Respublikasi Prezidenti Shavkat Mirziyoyev 6-noyabr kuni Vashington shahriga amaliy tashrifi doirasida Oq uyda Amerika Qo‘shma Shtatlari Prezidenti Donald Tramp bilan uchrashuv o‘tkazdi.
Uchrashuvdan avval davlatimiz rahbari Oq uyning Faxriy mehmonlar kitobida esdalik uchun qayd yozib qoldirdi.
Oval xonada o‘tgan muzokaralarda O‘zbekiston va AQSH o‘rtasidagi strategik sheriklikni yanada mustahkamlash, siyosiy muloqotni faollashtirish, savdo-iqtisodiy, investitsiyaviy hamda madaniy-gumanitar hamkorlikni kengaytirish masalalari atroflicha muhokama qilindi.
Joriy yil sentabr oyida Nyu-Yorkda oliy darajada erishilgan kelishuvlarni amaliyotga tatbiq etish masalalariga alohida e’tibor qaratildi. Tomonlar global va mintaqaviy kun tartibidagi dolzarb masalalar, jumladan “C5+1” formatida Markaziy Osiyo–AQSH hamkorligini yanada rivojlantirish istiqbollarini ko‘rib chiqdilar.
Prezident Shavkat Mirziyoyev Donald Trampni ichki va tashqi siyosatda qo‘lga kiritayotgan yuksak natijalari bilan tabriklab, xalqaro mojarolarni tinch yo‘l bilan hal etish borasidagi shaxsiy sa’y-harakatlarini yuqori baholadi.
O‘z navbatida, AQSH Prezidenti O‘zbekiston yetakchisining tashrif doirasida AQSH hukumati, yetakchi kompaniyalar va moliyaviy institutlar bilan o‘tkazgan mazmunli uchrashuvlarini mamnuniyat bilan qayd etdi.
Tomonlar qo‘shma tashabbus va loyihalarni ilgari surish uchun samarali institutsional mexanizmlarni yaratish va takomillashtirish muhimligini ta’kidladilar.
Uchrashuv yakunida Prezident Shavkat Mirziyoyev Donald Trampni o‘zi uchun qulay vaqtda O‘zbekistonga rasmiy tashrif bilan kelishga taklif etdi.
