Rossiyada eng ko‘p YTH o‘zbekistonlik haydovchilar ishtirokida sodir bo‘lgan
Joriy yilning yanvar–sentabr oylarida o‘zbekistonlik haydovchilar ishtirokida 827 ta yo‘l-transport hodisasi qayd etilgan.
Rossiya hududida xorijliklar ishtirokida sodir bo‘lgan yo‘l-transport hodisalari bo‘yicha 2025-yil yanvar–sentabr oylari uchun statistik ma’lumotlar e’lon qilindi.
Rossiya Ichki ishlar vazirligining Yo‘l harakati xavfsizligi ilmiy markazi ma’lumotlariga ko‘ra, mazkur davrda O‘zbekiston fuqarolari ishtirokida 827 ta yo‘l-transport hodisasi qayd etilgan. Bu o‘tgan yilning shu davriga nisbatan 18 foizga kam ko‘rsatkichni tashkil etadi.
Shu bilan birga, O‘zbekiston fuqarolari baxtsiz hodisalarda aybdorlik darajasi bo‘yicha 65 foizlik ko‘rsatkich bilan ikkinchi o‘rinda qayd etilgan.
Reytingda Tojikiston fuqarolari birinchi o‘rinda turib, ular ishtirokidagi 666 ta hodisaning 67 foizida haydovchi xatosi sabab bo‘lgan.
Armaniston va Ozarbayjon fuqarolari 64 foizli natija bilan uchinchi o‘rinda qayd etilgan.
Eng past ko‘rsatkich esa Belorussiya haydovchilarida — 50 foiz.
Shuningdek, Qozog‘iston fuqarolari 128 ta YTH bilan eng past ko‘rsatkichni qayd etgan, bu o‘tgan yilga nisbatan 21 foizga kamayganini bildiradi.
Tahlilchilarga ko‘ra, o‘zbekistonlik haydovchilar o‘rtasida YTHlar sonining kamayishi haydovchilarning transport madaniyati oshib borayotganidan dalolat beradi.
