Islom Maxachev Maddalena ustidan ishonchli g‘alaba qozondi
Rossiyalik jangchi endi ikki vazn toifasida kamar sohibiga aylandi.
UFC 322 turnirining markaziy bahsida Islom Maxachev avstraliyalik raqibi Jek Della Maddalenani raqobatli jangda ortda qoldirib, hakamlar qarori bilan g‘alaba qozondi. Bu natija unga yarim o‘rta vazn toifasida kamarni olib berib, uni UFC tarixidagi ikki karra chempionlar qatoriga qo‘shdi. Avval u yengil vazn toifasida chempionlik kamarini himoya qilgan edi.
34 yoshli Maxachev professional MMA faoliyatidagi 28-g‘alabasini qayd etdi, hisobida atigi bitta mag‘lubiyat bor. Maddalena esa faoliyatidagi uchinchi mag‘lubiyatni qabul qilishga majbur bo‘ldi, uning hisobida 18 g‘alaba mavjud.
Jangdan so‘ng arenada qisqa tortishuv yuzaga kelgani aytilmoqda. Xabarlarga ko‘ra, Konor MakGregorning do‘sti Dillon Denis va Habib Nurmagomedov jamoasi o‘rtasida kelishmovchilik yuzaga kelgan. Ammo vaziyat tezda bartaraf etilgan.
