Prezident Shavkat Mirziyoyev Ozarbayjon delegatsiyasini qabul qildi
Uchrashuvda neft-gaz, geologiya-qidiruv, “yashil” energiya va kimyo sanoati bo‘yicha qo‘shma loyihalar muhokama qilindi.
Prezident Shavkat Mirziyoyev Ozarbayjon Respublikasi energetika vaziri Parviz Shahbozovni qabul qildi.
Uchrashuv avvalida yuqori martabali mehmon Oʻzbekiston rahbariga Ozarbayjon Prezidenti Ilhom Aliyevning samimiy salomi va iliq tilaklarini yetkazdi.
Muloqot davomida Oʻzbekiston – Ozarbayjon strategik sherikligi va ittifoqchiligini yanada kengaytirish, hamkorlikni chuqurlashtirish masalalari muhokama qilindi. Barcha darajalardagi aloqalarning faol ekani, tovar ayirboshlash barqaror oʻsayotgani va energetika sohasidagi muvaffaqiyatli hamkorlik alohida qayd etildi.
Shuningdek, neft va gaz sohasi, geologiya-qidiruv ishlari, “yashil” energiyani rivojlantirish hamda kimyo sanoatida qoʻshma loyihalarni ilgari surish muhimligi taʼkidlandi.
