“O‘zbekiston YEOII oilasiga qo‘shilsa, xursand bo‘lamiz” — Lukashenko
Belarus Prezidenti O‘zbekistonni YEOII doimiy aʼzosi sifatida qabul qilishga tayyorligini bildirdi.
Belarus Prezidenti Aleksandr Lukashenko O‘zbekistonni Yevroosiyo Iqtisodiy Ittifoqiga (YEOII) to‘liq aʼzo bo‘lishga taklif qildi. Bu bayonot Sankt-Peterburg shahrida o‘tkazilgan Oliy Yevroosiyo Iqtisodiy Kengashi yig‘ilishida bildirildi.
Belarus rahbari o‘z nutqida O‘zbekistonning YEOII iqtisodiy makoniga integratsiyalashuv yo‘lidagi faol taraqqiyotini alohida taʼkidladi va mamlakatni tashkilot safiga qo‘shishdan mamnun bo‘lishini bildirdi.
“Rostini aytsam, O‘zbekistonning oxir-oqibat YEOIIning to‘laqonli aʼzosiga aylanishini ko‘rib xursand bo‘lamiz. Siz shu yo‘nalishda harakat qilyapsiz va buni amalga oshirish uchun ko‘p ish qilyapsiz. Agar O‘zbekiston bizning oilamizga qo‘shilsa, juda yaxshi bo‘lardi. Sizni ko‘rishdan doim xursand bo‘lamiz”, – dedi Lukashenko o‘zbekistonlik hamkasi Shavkat Mirziyoyev nutq so‘zlaganidan so‘ng.
Hozirda O‘zbekiston YEOIIda kuzatuvchi maqomiga ega bo‘lib, bu mamlakatga tashkilot doirasidagi ayrim tadbirlarda ishtirok etish imkonini beradi. YEOII beshta davlatni – Armaniston, Belarus, Qozog‘iston, Qirg‘iziston va Rossiyani – birlashtirib, tovarlar, xizmatlar, kapital va ishchi kuchining erkin harakatlanishi uchun yagona iqtisodiy makon yaratadi.
