APL. "Manchester Siti" “Liverpul”ni mag‘lub etdi
O'yinda Abduqodir Husanov kichik jarohat oldi.
Angliya Premyer Ligasining 25-turidan o‘rin olgan “Liverpul” va “Manchester Siti” o‘rtasidagi markaziy uchrashuv yakunlandi. Liverpul shahridagi “Enfild” stadionida kechgan bahsda mehmonlar 2:1 hisobida irodali g‘alabaga erishdi.
Uchrashuvning birinchi bo‘limi keskin va teng kurashlar ostida o‘tdi. Har ikki jamoa bir nechta xavfli vaziyatlar yaratgan bo‘lsa-da, tanaffusga qadar hisob ochilmadi.
Ikkinchi bo‘lim boshida tashabbus mezbonlar tomonida bo‘ldi. “Liverpul” futbolchilari bir necha bor gol urishga yaqin keldi, ammo darvozabon ishonchli harakat qildi. 61-daqiqada esa “Manchester Siti” safida to‘p surayotgan o‘zbekistonlik himoyachi Abduqodir Husanov darvozabon bilan to‘qnashuv oqibatida jarohat oldi. Bosh murabbiy Pep Gvardiola uni ehtiyot chorasi sifatida Ruben Diashga almashtirdi.
74-daqiqada mezbonlar hisobni ochdi — Dominik Soboslai aniq zarba bilan jamoasini oldinga olib chiqdi. Shundan so‘ng “Manchester Siti” hisobni tenglashtirish uchun bosimni oshirdi. 84-daqiqada Erling Holandning uzatmasidan keyin Bernardu Silva gol urib, muvozanatni tikladi.
Bahsning so‘nggi daqiqalarida esa mehmonlar g‘alabani ilib ketdi. Hakam tomonidan belgilangan penalti zarbasini Erling Holand aniq amalga oshirib, jamoasiga muhim uch ochkoni taqdim etdi.
Shu tariqa, “Manchester Siti” 2:1 hisobida g‘alaba qozonib, turnir jadvalida 30 ochko bilan ikkinchi o‘rinda bormoqda. “Liverpul” esa 39 ochko bilan oltinchi pog‘onada qolmoqda.
