Saudiya klublari Mohamed Salahni Ronalduning o'rniga tayyorlamoqda
Ronalduning yaqin orada ligani tark etishi mumkinligi haqidagi xabarlar fonida, Saudiya “Liverpool” yulduzining haftalik maoshini uch baravar oshirishni taklif qilmoqda.
“Liverpool” hujumchisi Mohamed Salah faoliyatini Saudiya Arabistonida davom ettirishi mumkin. “Mirror” nashriga ko‘ra, Saudiya klublari 33 yoshli yulduzga hozirgi maoshini uch baravar oshirish taklifini taqdim qilmoqda.
Agar Salah taklifni qabul qilsa, uning haftalik maoshi 1,2 mln funt (1,38 mln yevro)ga yetadi. Saudiyaliklar uni chempionatning asosiy yulduzi sifatida ko‘rishni rejalashtirmoqda. Bu esa Krishtianu Ronalduning yaqin orada ligani tark etishi mumkinligi haqidagi xabarlar fonida alohida ahamiyatga ega.
“Liverpool” klubi esa Salahni sotib yuborish orqali maosh jamg‘armasini kamaytirish va katta transfer summasiga ega bo‘lishni maqsad qilmoqda. Klub JCh-2026 boshlanishidan oldin kelishuvni yakunlashni rejalashtirmoqda.
Eslatib o‘tamiz, 41 yoshli Ronaldo Saudiya investitsiya fondi boshqaruvidan norozi bo‘lib, “Al Nasr” o‘yinlarini boykot qilmoqda. U yozda MLS yoki Yevropa chempionatlariga qaytishi kutilmoqda. Salah esa uning o‘rnini bosishi kerak bo‘lgan asosiy figura sifatida ko‘rilmoqda.
Hozirda Salahning “Liverpool” bilan shartnomasi 2027 yilgacha amal qiladi va haftalik 400 ming funt maosh olmoqda. “Transfermarkt”ga ko‘ra, futbolchining bozor qiymati 30 mln yevro atrofida baholangan.
