"Al Nasr" Ronalduga vaziyatni barqarorlashtirishga va’da berdi
Klub rahbari iste’foga chiqarilishi mumkin.
Saudiya «Al Nasr» klubi rahbariyati hujumchi Krishtianu Ronalduga klubdagi vaziyat tez orada barqarorlashtirilishini va’da qilgan. Bu haqda Arriyadiyah nashri xabar berdi.
Avvalroq, portugaliyalik futbolchi Saudiadagi «Ar Riyod» va «Al Ittihod»ga qarshi o‘yinlarni o‘tkazib yuborgani ma’lum bo‘lgan edi. Xabarlarga ko‘ra, Ronaldo Saudiya Suveren jamg‘armasi (PIF)ning «Al Nasr»ni raqobatchilarga nisbatan boshqarish uslubidan norozi bo‘lib, bu klubning chempionlik kurashiga ta’sir qilayotganini aytgan. Shuningdek, u Karim Benzemaning «Al Hilol»ga o‘tishiga ham qarshi bo‘lgan.
9-fevral kuni Ronaldu norozi bo‘lishni to‘xtatgani ma’lum bo‘ldi — «Al Nasr» klub xodimlari oldidagi maosh qarzini to‘lab berdi. Nashrning xabariga ko‘ra, Ronalduga «o‘tgan xatolar tuzatilishi» va qarzdorlik masalalarining yaqinda hal etilishi va’da qilindi.
Shuningdek, dekabr oxirida vakolati cheklangan direktorlar — Joze Semedo va Simao Coutinho — huquqlarini qayta tiklashi kutilmoqda.
Klub ma’muriy tuzilmasida ham katta o‘zgarishlar rejalashtirilgan: direktorlar kengashi raisi Abdulla Al Majid iste’foga chiqishi mumkin. Ma’lumotlarga ko‘ra, Al Majidning bosh murabbiy Jorje Jezus faoliyati haqidagi ayrim fikrlari klubdagi portugaliyaliklar norozi bo‘lishiga sabab bo‘lgan.
