Forishda kuchli yomg‘irdan so‘ng sel toshqini kuzatildi
30 ga yaqin xonadonlarning hovlisi va tomorqalariga sel suvlari kirgan.
Joriy yilning 14 fevral kuni soat 04:53 da Jizzax viloyati hududidagi Forish tumanida qisqa muddatli kuchli yomg‘ir yog‘ishi natijasida sel-suvlari oqimi kuzatilgan. Bu haqda FVV matbuot xizmati xabar berdi.
Dastlabki maʼlumotlarga ko‘ra, “Qizilqum” MFY, Qizilqum qishlog‘i “Erali” ko‘chasidagi taxminan 30 ga yaqin aholi xonadonlarning hovlisi va tomorqalariga sel-suvlari kirishi kuzatilgan.
Hodisa oqibatlarini bartaraf etish maqsadida zarur texnika va kuch-vositalar jalb etildi.
Hodisa natijasida vafot etganlar va jarohat olganlar qayd etilmadi. Vaziyat hududiy favqulodda xizmatlar tomonidan to‘liq nazoratga olingan.
