“Darhol yo‘lga chiq”: Tramp Ronalduni AQSHga chaqirdi
Amerika rahbari Krishtianuni eng buyuk futbolchi deb atadi.
AQSH Prezidenti Donald Tramp dunyoga mashhur portugaliyalik futbolchi Krishtianu Ronalduni Amerikaga kelishga chaqirdi. Ijtimoiy tarmoqlarda tarqalgan videomurojaatda Tramp Ronalduni “barcha davrlarning eng buyuk futbolchisi” deb atagan.
“Krishtianu Ronaldu, sen barcha davrlarning eng buyuk futbolchisisan. Amerikada sen bizga keraksan. Darhol yo‘lga chiq — biz tomon tezroq kelishing kerak”, degan Tramp murojaatida.
Video qisqa formatda eʼlon qilingan bo‘lib, unda sunʼiy intellekt yordamida yaratilgan sahnalar ham mavjud. Ayrim lavhalarda Tramp va Ronaldu Oq Uy hududida futbol o‘ynayotgandek tasvirlangan.
Mazkur bayonot 2026 yilgi futbol bo‘yicha Jahon chempionati arafasida yangradi. Maʼlumki, turnir AQSH, Kanada va Meksika mezbonligida o‘tkaziladi.
Kuzatuvchilar Trampning chaqirig‘ini bir necha yo‘sinda talqin qilmoqda.
Xususan, Ronalduni AQSHning MLS ligasiga taklif qilish ehtimoli bor. Yoki Jahon chempionati oldidan futbolga qiziqishni oshirishga qaratilgan ramziy murojaat bo‘lish mumkin.
Hozirda Ronaldu Saudiya Arabistonining “Al-Nassr” klubida to‘p surmoqda. U hali mazkur chaqiriqqa rasmiy munosabat bildirmagan.
