Meliqo‘ziyev ganalik raqibini texnik nokautga uchratdi
U shu tariqa WBA Continental Americas kamarini himoya qildi va 17-g‘alabasini qayd etdi.
AQSHning Nevada shtati Las-Vegas shahrida bo‘lib o‘tayotgan navbatdagi professsional boks oqshomida Bektemir Meliqo‘ziyevning ganalik bokschini texnik nokautga uchratib, jangni muddatidan avval yakunladi.
Musobaqa doirasida super o‘rta vazn toifasidagi Bektemir Meliqo‘ziyev Gana vakili Sena Agbekoga qarshi ringga ko‘tarildi. Jang o‘n raundga mo‘ljallangan edi. Biroq ring yettinchi raundda Bektemirning texnik nokautli g‘alabasi bilan yakunlandi.
O‘yindan keyingi intervyusida Meliqo‘ziyev ikkinchi o‘rta vazn toifasida WBA chempioni Xose Armando Resendis chempionlik kamarini himoya qilishini, WBA esa unga ushbu jang g‘olibiga qarshi chempionlik jangi vaʼda qilganini aytdi.
Maʼlumot uchun, 29 yoshli Bektemir Meliqo‘ziyev prof faoliyati davomida 18 ta jang o‘tkazib, 17 ta g‘alaba va 1 ta mag‘lubiyat qayd etgan.
