“Nimaga oylik olyapti” — Prezident rektorlarni keskin tanqid qildi
Davlat rahbari oliygoh bitiruvchilarini ish bilan taʼminlash bo‘yicha yetarli natija yo‘qligini taʼkidlab, rektorlarni qatʼiy ogohlantirdi.
“Ko‘ksaroy” qarorgohida o‘tkazilgan yoshlar bilan muloqotda Prezident Shavkat Mirziyoyev oliy taʼlim tizimidagi mavjud muammolar, xususan taʼlim sifati va bitiruvchilar bandligi masalalariga alohida to‘xtalib, oliy taʼlim muassasalari rahbarlari faoliyatini keskin tanqid qildi.
Davlat rahbari o‘z nutqida bir necha yil davomida faoliyat yuritib, talabalarni ish bilan taʼminlash bo‘yicha yetarli natijaga erishmagan rektorlar masʼuliyati masalasini ko‘tardi. Prezident, oliygohda tahsil olgan har bir talabaning kelajakda band bo‘lishi muhim vazifa ekanini taʼkidladi.
Shuningdek, mamlakatdagi 157 ta oliy taʼlim muassasasidan atigi 12 tasi bitiruvchilar bilan amaliy loyihalar asosida ishlayotgani, jumladan, bank kreditlari orqali 100 nafardan ortiq talabani tadbirkorlikka yo‘naltirgani maʼlum qilindi.
“Qolgan rektorlar qayerga qarab o‘tiribdi? Nimaga oylik olyapti? Nimaga vijdoni bo‘lsa, 50 foiz oyligini kassaga topshirmaydi, davlatga? Vijdonimiz ham qolmadi”, dedi davlat rahbari.
