O‘zbekiston ulamolari prezident Shavkat Mirziyoyevga minnatdorlik maktubi yo‘lladi
Maktubda “Vaqf” fondiga 750 milliard so‘m, Ijtimoiy himoya agentligi orqali 300 milliard so‘m mablag‘ ajratilishi, masjidlarda xatmi Qur’onlarning tizimli tashkil etilishi va yirik ma’rifiy loyihalar e’tirof etildi.
O‘zbekiston musulmonlari idorasi Ulamolar kengashi a’zolari va taniqli ulamolar ramazon oyi munosabati bilan O‘zbekiston Prezidenti Shavkat Mirziyoyevga tabrik va minnatdorlik maktubi yo‘lladi.
Maktubda davlat rahbarining aholini ijtimoiy himoya qilish borasidagi sa’y-harakatlari, ramazonda ehtiyojmandlarga ajratgan mablag‘lari va diniy sohadagi islohotlari alohida qayd etilgan. Xususan, 16-fevral kuni ramazon oyida ehtiyojmand aholini ijtimoiy himoya qilish masalalariga bag‘ishlab o‘tkazilgan yig‘ilishda qabul qilingan “Vaqf” xayriya jamoat fondiga 750 milliard so‘m, Ijtimoiy himoya milliy agentligi orqali esa 300 milliard so‘m mablag‘ ajratilishi to'g'risidagi qarorlari minglab oilalar uchun katta ko‘mak bo‘lgani ta'kidlangan.
Ulamolar shuningdek, mamlakatda 2000 dan ziyod masjidlarda xatmi Qur’onlarning tizimli tashkil etilishi, Imom Buxoriy yodgorlik majmuasi va Islom sivilizatsiyasi markazi kabi ma’rifiy loyihalar amalga oshirilayotganini ham e'tirof etilgan.
Maktub so‘ngida prezidentga mustahkam sog‘lik, oilaviy baxt-saodat va mas’uliyatli faoliyatida muvaffaqiyatlar tilab, yurt tinchligi, xalq farovonligi va ramazon oyining barakoti uchun duolar qilingan.
Maktub muftiy — shayx Nuriddin Xoliqnazar, shayx Abdulaziz Mansur, Rahmatullo qori Obidov, Homidjon domla Ishmatbekov, Zayniddin domla Eshonqulov, shayx Rahmatulloh Termiziy, Rahimberdi domla Rahmonov, shayx Alijon qori Haydarov, Ismoil Muhammad Sodiq, Muhammadayubxon domla Homidov, Habibulloh qori Abdurazzoqov va barcha hududlardagi bosh imom-xatiblar nomidan yo‘llangan.
